جبينة/حكاية اطفال من حكايا ستي اليافاوية اللي لسه ما حكتها
جبينة/حكاية من حكايا ستي اليافاوية اللي لسه ما حكتها
في هالليلة طلبنا من ستي حكاية ما فيها غولة ولا تنين ولا شي بيخوف،قالتلنا راح احكيلكم قصة جبينة.عدلت قعدتها وقالت:"
كان يا مكان في قديم الزمان هالمرة ،لا بتحبل ولا بتجيب . يوم مر بياع هالجبنة ؟ قامت قالت :" يا طالبة يا غالبة تطعمني بنت يكون وجهها أبيض مثل قرص هالجبنة ؟" وكأنه باب السماء كان مفتوح والله استجاب لدعاها ،وما مرت تسع شهور الا وخلفت بنت متل فلقة القمر،بيضاء،ووجهها أبيض مثل قرص الجبنة ،عشان هيك سمتها جبينة .كبرت جبينة وصارت حلوة كثير , وصارت كل بنات الحارة يغاروا منها .وفي يوم قرروا يخلصوا منها فراحوا وقالوا الها:" يلا يا جبينة نروح نلقط جوز ". قالتلهم:"روحوا قولوا لامي".راحوا وحكوا لإمها :" ياإم جبينة وحياة جبينه تخلي جبينة تيجي معانا نلقط جوز أبو جبينة وحياة جبينة تخلي جبينة تيجي معانا نلقط جوز ." قالهم :" أنا ما بمون على حالي . روحوا شاوروا عمتها".ركضوا لعند العمة :"يا عمة جبينة وحياة جبينة تخلي جبينة تيجي معانا نلقط جوز".
قالتلهم:" أنا ما الي علاقة، رحوا قولوا لخالتها."رحوا قالوا لخالتها :" يا خالة جبينة بحياة جبينة تخلي جبينة تيجي معانا نلقط جوز".
قالتلهم خالتها :" طيب خليها تروح ". سحبوا حالهم هالبنات و رحوا يلقطوا جوز.لما وصلوا شجر الجوز قالوا :" مين اللي بدها تطلعلنا عالشجرة ؟ جبينة كانت أصغر وحدة و أعقل وحدة قالت :" أنا بطلع"
". طلعت وصارت تقطعلهم جوز وتزت تحت الشجرة . قالولها احنا بنملليلك جرتك. ملوا جراتهم جوز ومللولها جرتها حلزون . ولما عتمت الدنيا تركوها مشعبطة على الشجرة وروحوا على بيوتخم وما ساعدوها تنزل عن الشجرة.جبينة ما عرفتش تنزل عن الشجرة وصارت الدنيا ليل. راحت إمها سألت رفقاتها قالولها جبينة ما راحتش معنا. وجبينة مشعلقة على الشجرة ،اجا خيال راكب على فرس وصارت الفرس تقرب على هالشجرة خايفة وترجع لورا،تطلع الفارس على الشجرة شاف هالبنت قالها :" انزلي عن هالشجرة " مارضيتش لأنها خايفة قالها :" عليكي الأمان و أمان الله" ردت هالبنت ونزلت لما مدلهل ايدو. و ركبها وراه عالفرس وروحها معاه.بالليل جبينة دهنت حالها كلها أسود علشان ما حدا يعرفها , الصبح فكروها عبدة صاروا يودوها تسرح بالغنم و صارت جبينةكل يوم و هي سارحة بهالغنمات تنادي:
ياطيور طايرة في جبال عالية
سلموا ع امي و أبوي وقولهم جبينة صارت راعية
ترعى غنم.. ترعى نوق.. وتقعد تحت الدالية
و تبكي , والطيور تبكي معها و الغنم و يبطل ياكل و يبكي معها . لاحظ ابن الأمير انه الغنمات بتروح عالمرعى وبترجع جوعانة و بدون أكل وكل يوم بتضعف عن يوم،
قال :" والله غير ألحقها و أشوف شومالها.
لحق الغنمات والراعية . لمن وصلوا ع المرعى قعدت جبينة و صارت تنادي:
ياطيور طايرة في جبال عالية
سلموا ع امي و أبوي وقولهم جبينة صارت راعية
ترعى غنم ..ترعى نوق.. وتقعد تحت الدالية
ور تبكي , وتصير هالطيور تبكي و الغنم تبطل تاكل و تصير كلها تبكي, وكل شي موجود حوليها صار يبكي .وهو ابن الأمير وقف وصار يبكي.
قرب منها وقالها :" تعالي و احكيلي. مين انتي , وشواللي صار معك ؟
قالتله :" أنا اسمي جبينة , وصار معي هيك وهيك وهيك ."
وقامت هالشحبار الأسود عن وجهها ،الا هي شو ؟ مثل القمر .
بس شافها الامير ابن الملك حبها و سافر لعند امها وابوها وطلبها للزواج وقاموا هالأفراح و هالليالي الملاح وخلفوا صبيان وبنات.
وتوته توته خلصت الحدوته ....حلوة ولا مفتوتة؟
في هالليلة طلبنا من ستي حكاية ما فيها غولة ولا تنين ولا شي بيخوف،قالتلنا راح احكيلكم قصة جبينة.عدلت قعدتها وقالت:"
كان يا مكان في قديم الزمان هالمرة ،لا بتحبل ولا بتجيب . يوم مر بياع هالجبنة ؟ قامت قالت :" يا طالبة يا غالبة تطعمني بنت يكون وجهها أبيض مثل قرص هالجبنة ؟" وكأنه باب السماء كان مفتوح والله استجاب لدعاها ،وما مرت تسع شهور الا وخلفت بنت متل فلقة القمر،بيضاء،ووجهها أبيض مثل قرص الجبنة ،عشان هيك سمتها جبينة .كبرت جبينة وصارت حلوة كثير , وصارت كل بنات الحارة يغاروا منها .وفي يوم قرروا يخلصوا منها فراحوا وقالوا الها:" يلا يا جبينة نروح نلقط جوز ". قالتلهم:"روحوا قولوا لامي".راحوا وحكوا لإمها :" ياإم جبينة وحياة جبينه تخلي جبينة تيجي معانا نلقط جوز أبو جبينة وحياة جبينة تخلي جبينة تيجي معانا نلقط جوز ." قالهم :" أنا ما بمون على حالي . روحوا شاوروا عمتها".ركضوا لعند العمة :"يا عمة جبينة وحياة جبينة تخلي جبينة تيجي معانا نلقط جوز".
قالتلهم:" أنا ما الي علاقة، رحوا قولوا لخالتها."رحوا قالوا لخالتها :" يا خالة جبينة بحياة جبينة تخلي جبينة تيجي معانا نلقط جوز".
قالتلهم خالتها :" طيب خليها تروح ". سحبوا حالهم هالبنات و رحوا يلقطوا جوز.لما وصلوا شجر الجوز قالوا :" مين اللي بدها تطلعلنا عالشجرة ؟ جبينة كانت أصغر وحدة و أعقل وحدة قالت :" أنا بطلع"
". طلعت وصارت تقطعلهم جوز وتزت تحت الشجرة . قالولها احنا بنملليلك جرتك. ملوا جراتهم جوز ومللولها جرتها حلزون . ولما عتمت الدنيا تركوها مشعبطة على الشجرة وروحوا على بيوتخم وما ساعدوها تنزل عن الشجرة.جبينة ما عرفتش تنزل عن الشجرة وصارت الدنيا ليل. راحت إمها سألت رفقاتها قالولها جبينة ما راحتش معنا. وجبينة مشعلقة على الشجرة ،اجا خيال راكب على فرس وصارت الفرس تقرب على هالشجرة خايفة وترجع لورا،تطلع الفارس على الشجرة شاف هالبنت قالها :" انزلي عن هالشجرة " مارضيتش لأنها خايفة قالها :" عليكي الأمان و أمان الله" ردت هالبنت ونزلت لما مدلهل ايدو. و ركبها وراه عالفرس وروحها معاه.بالليل جبينة دهنت حالها كلها أسود علشان ما حدا يعرفها , الصبح فكروها عبدة صاروا يودوها تسرح بالغنم و صارت جبينةكل يوم و هي سارحة بهالغنمات تنادي:
ياطيور طايرة في جبال عالية
سلموا ع امي و أبوي وقولهم جبينة صارت راعية
ترعى غنم.. ترعى نوق.. وتقعد تحت الدالية
و تبكي , والطيور تبكي معها و الغنم و يبطل ياكل و يبكي معها . لاحظ ابن الأمير انه الغنمات بتروح عالمرعى وبترجع جوعانة و بدون أكل وكل يوم بتضعف عن يوم،
قال :" والله غير ألحقها و أشوف شومالها.
لحق الغنمات والراعية . لمن وصلوا ع المرعى قعدت جبينة و صارت تنادي:
ياطيور طايرة في جبال عالية
سلموا ع امي و أبوي وقولهم جبينة صارت راعية
ترعى غنم ..ترعى نوق.. وتقعد تحت الدالية
ور تبكي , وتصير هالطيور تبكي و الغنم تبطل تاكل و تصير كلها تبكي, وكل شي موجود حوليها صار يبكي .وهو ابن الأمير وقف وصار يبكي.
قرب منها وقالها :" تعالي و احكيلي. مين انتي , وشواللي صار معك ؟
قالتله :" أنا اسمي جبينة , وصار معي هيك وهيك وهيك ."
وقامت هالشحبار الأسود عن وجهها ،الا هي شو ؟ مثل القمر .
بس شافها الامير ابن الملك حبها و سافر لعند امها وابوها وطلبها للزواج وقاموا هالأفراح و هالليالي الملاح وخلفوا صبيان وبنات.
وتوته توته خلصت الحدوته ....حلوة ولا مفتوتة؟
Keine Kommentare:
Kommentar veröffentlichen